სასკოლო ცხოვრების აუცილებელი ნაწილი კინო რომ უნდა იყოს, ეს მეტ-ნაკლებად ყველამ იცის. მაგრამ საქმე ისაა, ვინ რამდენად აქცია კინო სასიამოვნო, სახალისო, ან, როგორც კინოკლუბში ვამბობთ ხოლმე, „სასწაულ“ რესურსად. ახალ სასკოლო სახელმძღვანელოებში ხშირად შეხვდებით მითითებას, რომ ვნახოთ ესა თუ ის ფილმი. რა თქმა უნდა, მასწავლებელს აქვს უფლება, ევალება კიდეც, ხშირად ჩაატაროს კინოჩვენება, მოაწყოს საუბრები ნანახის შესახებ, კარგი ფილმის ნახვის შემდეგ შიძლება დავწეროთ ესე, რეცენზია, შევქმნათ შთაბეჭდილებების ალბომი, მოვაწყოთ მცირე გამოფენა ფილმის მიხედვით, წამოვჭრათ სადისკუსიო
საკითხები, დავხატოთ კადრები, მოვაწყოთ კინოვიქტორინა, გადავიღოთ რომელიმე ეპიზოდის ჩვენეული ვერსია, ვისაუბროთ კინოში გამოყენებულ მუსიკაზე, ოპერატორულ ან სამახიობო ოსტატობაზე, ხერხებზე, რომელსაც იყენებს კინო, შევადაროთ კინო ხელოვნების სხვა ჟანრებს, ერთად დავაკვირდეთ დეტალებს, გავავარჯიშოთ „კინოთვალი“ და ა.შ. დიდი ბედნიერებაა, სადაც ამას ახერხებენ მოსწავლეები და მასწავლებლები, იქნება ეს არაფორმალური თუ ფორმალური სახის შეხვედრები. მით უფრო, როცა კინოთეატრის ფუფუნება მუნიციპალიტეტებს არ აქვთ.
ჰოდა, თუ ვინმე მეკინოვე კითხულობთ ამ წერილს და ჯერაც არ იცით „CinéDOC - school“-ის შესახებ, გვიხარია, რომ ჩვენი კინოკლუბისგან გაიგებთ. აქვე ბარემ გეტყვით, რომ „CinéDOC-Tbilisi“ არის პირველი საერთაშორისო დოკუმენტური კინოს ფესტივალი სამხრეთ კავკასიაში, რომლის მიზანი დოკუმენტური კინოს პოპულარიზაციაა. „CinéDOC-Tbilisi“ არის პირველი კინოფესტივალი საქართველოში, რომელსაც მხარს უჭერს ევროკავშირის პროექტი „კრეატიული ევროპა“ (Creative Europe).
ფესტივალი 2013 წლიდან არსებობს და ორგანიზებას უწევს სხვადასხვა სახის შეხვედრებს ახალგაზრდა რეჟისორებისა და პროდიუსერებისათვის. მთელი მსოფლიოდან მოწვეულები არიან დოკუმენტური კინოს პროფესიონალები, რომლებიც პროექტის განვითარების ფარგლებში სესიებსა და პრეზენტაციებში იღებენ მონაწილეობას.
მაგრამ ეს ყველაფერი არაა. ფესტივალს აქვს საბავშვო-ახალგაზრდული მიმართულება, რომლითაც ჩვენი კინოკლუბი რამდენიმე წელია სარგებლობს - “CinéDOC-Young“ - მის ფარგლებში იმართება ჩვენებები ბავშვებისა და ახალგაზრდებისთვის. გარდა იმისა, რომ პანდემიამდე თბილისში ვესწრებოდით საფესტივალო ჩვენებებს, რეგიონული მინიფესტივალის ჩხოროწყუში ჩატარებაც მოვახერხეთ (რანდენადაც პანდემიამ ამის საშუალება მოგვცა). ყოველი დღე „სინედოკთან“ ერთად მართლა დაუვიწყარი იყო კინოკლუბ „დუბლის“ წევრებისათვის.
და ესეც არ არის ყველაფერი. „CinéDOC“ ისევ აგრძელებს თანამშრომლობას ამჯერად ყველა კინომოყვარულთან, თითოეულ მოსწავლესა და მასწავლებელს გვაქვს შესაძლებლობა კვირაში ერთხელ ონლაინფორმატით ერთად ვუყუროთ ფილმს და ერთადვე მოვაწყოთ განხილვა. საქართველოს ნებისმიერი კუთხიდან შეიძლება შვუერთდეთ კინოსეანსებს და ვისაუბროთ მრავალ საკითხზე. თემატიკა მრავალფეროვანია, სამოქალაქო განათლების მასწავლებლებისთვის განსაკუთრებით ძვირფასია რესურსია ყოველი ფილმი. დღეს იმდენს ვსაუბრობთ სამოქალაქო ცნობიერების ამაღლებაზე,
ყველანი ვთანხმდებით, რომ ეს მთავარი პრობლემაა ჩვენი საზოგადოების და, ვფიქრობთ, კინო საუკეთესო წამალია, საუკეთესო მასწავლებელია თანაგრძნობის, დანახვის, გაგების. ფილმები ნამდვილ ადამიანებზე მოგვითხრობენ, ისინი სამყაროს სხვადასხვა კუთხიდან თავიანთ ისტორიებს გვიყვებიან, მათ ამბებს გულგრილად ვერ ჩავუვლით, ეს ისტორიები შეიძლება დიდი ბიძგი იყოს ნებისმიერი ჩვენგანისათვის.
თამამად შეიძლება ითქვას, ერთი ასეთი შეხვედრა შეიძლება ხსნა და შვება იყოს ბევრი ჩვენგანისათვის, რადგან საუბრები გულახდილია და თემატიკა მრავალფეროვანი. აქ რამდენიმე თაობა ხვდება ერთმანეთს, უამრავი ემოცია იყრის თავს. ჩვენ ერთად ვუყურებთ რა, ვსწავლობთ...
რაღა ბევრი გავაგრძელოთ, „CinéDOC - school“ გელოდებათ ყოველ სამშაბათს, 20 საათზე! შეგიძლიათ მეგობრები და ოჯახის წევრები მოიწვიოთ ეკრანებთან, გაიცნოთ ადამიანები, გაუზიაროთ ემოციები მათ!
„CinéDOC - school“ აერთიანებს!
