არაჩვეულებრივი ამბები ერთხელაც ჩვეულებრივ, სადაგ მოვლენებად იქცევა ხოლმე. ჩვენს შემთხვევაშიც ასე იყო. თუმცა კინოკლუბ "დუბლის" დაფუძნებიდან დღემდე, მეოთხე წელია, რაც არასდროს, არც ერთხელ, არც ერთი ფილმის ჩართვა და ყურება არ არის ჩემთვის ჩვეულებრივი და ბავშვებიც იყვარებენ ამ უჩვეულოობას ნელ-ნელა, წვეთ-წვეთად.
კინო არის ბედნიერება. ბედნიერება თუ არ გააზიარე, ის სრულყოფილი ვერ იქნება. ამისთვის არსებობს "დუბლიც". ადვილი არაა რამე შეაყვარო. ძალიან ძნელია, მაგრამ ამაზე არ ფიქრობ. უბრალოდ, მთელი გულით გასცემ იმას, რაც თვითონ გიყვარს და მერე აღმოაჩენ, რომ ერთად გიყვართ.
ეს 14 დღე იყო მართლაც ზაფხულის ჯადოსნური 14 დღე და კიდევ ერთხელ დავრწმუნდი, რა ძლიერია კინომაგია. ნატუკა - ხაბუმეს თემის N1 საჯარო სკოლაში, ხოლო გიგი - აფხაზეთის N10 საჯარო სკოლის კინოკლუბ "დუბლში" ორი კვირის განმავლობაში ატარებდნენ კინოგაკვეთილებს 4-5 საათის განმავლობაში, მოსწავლეებთან ერთად უყურებდნენ კინოშედევრებს, საუბრობდნენ, აანალიზებდნენ, განიხილავდნენ, ბჭობდნენ, დავობდნენ, გამოთქვამდნენ ურთიერთსაწინააღმდეგო მოსაზრებებს, ხუმრობდნენ, იცინოდნენ, ავლებდნენ პარალელებს სხვა ფილმებთან, ტექსტებთან, პირად გამოცდილებასთან, ეცნობოდნენ კინოსამყაროს ამბებს რეჟისორებზე, მონტაჟსა თუ მსახიობებზე, ტექნიკურ საკითხებსაც ეხებოდნენ, ასრულებდნენ ძალიან სახალისო დავალებებს, იღებდნენ თემატურ ფოტოებს, პორტრეტებს, მოვლენებს, ასრულებდნენ სხვადასხვა სახის ვიდეოდავალებებს. მსმენელთა რაოდენობა იყო გათვალისწინებულზე მეტი. ბავშვებმა მე-14 დღეს თავიანთი გადაღებული პატარა ფილმებიც შემოგვთავაზეს. კინომაგიამ 14 დაუვიწყარი დღე გვაჩუქა. მაგრამ ეს არ არის ყველაფერი...
ყველას ძალიან დიდი მადლობა, ვინც კინოზაფხული უზრუნველყო #კინოჩხოროწყუში და აჩუქა #მეტი_კინო_სკოლას - სსიპ აფხაზეთის X საჯარო სკოლისა და სსიპ ხაბუმის III საჯარო სკოლების დირექტორებს, მერიის კულტურის სამსახურს, საგანმანათლებლო რესურსცენტრს. მათი თანადგომის გარეშე გაგვიჭირდებოდა.
განსაკუთრებულად დიდი მადლობა ბავშვებს, რომელთა მეშვეობით კინოსკოლის დღეები ასეთი საინტერესო და ხალისით სავსე იყო და ლიკას, რომელიც ჩვენი კინოაქტიურიბისთვის ამდენ რამეს აკეთებს წლებია. მეც ვესწრებოდი ხოლმე გიგისა და ბავშვების კინოგაკვეთილებს და აქ ისევ გავიმეორებ იმას, რაც მათთანაც ვთქვი: არის რაღაცები, რის ფასსაც ნელ-ნელა, დროთა განმავლობაში უფრო მიხვდებიან, მეტად და მეტაც იგრძნობენ. გავა დრო და ასეთი დღეები შედეგს მოიტანს და მადლობა კიდევ ერთხელ ყველას, გასაკუთრებით ნატუკას და გიგის დაუღალავი მუშაობისა და ერთგულებისათვის. მალე, მათ ფილმს "ღამის მორიგე" ვიხილავთ, რომელიც ეროვნული კინოცენტრის მხარდაჭერით შეიქმნა, ფილმის პრემიერა უკვე შედგა თბილისისა და ბათუმის საერთაშორისო კინოფესტივალებზე და ძალიან გვიხარია, რომ ეს ორი ახალგაზრდა ნიჭიერი რეჟისორი ჩვენთან დაუღალავად თანამშრომლობს. წარმატებებს ვუსურვებთ მათ, ხოლო კინოკლუბ „დუბლს“ ბედნიერ ახალ სეზონს.
No comments:
Post a Comment